中華民國國歌

本文指1937年起的中華民國國歌。較早的請看中國國歌

taⁿ的中華民國國歌是由孫中山佮伊的幕僚作詞，程懋筠作曲。別名三民主義歌，嘛是中國國民黨的黨歌。

佇1937年正式揀做國歌以前，hőng看做中華民國國歌的有〈卿雲歌〉、〈中華雄立宇宙間〉等歌曲。

歷史

1912年，中華民國臨時政府佇南京成立，教育總長蔡元培對公眾徵求國歌，落尾揀〈五旗共和歌〉做臨時國歌，由沈恩孚作詞，沈彭年作曲；後來北洋政府捌先後用兩版的〈卿雲歌〉做國歌。

1924年6月16日，孫文佇廣州黃埔陸軍軍官學校開學典禮對師生發表訓詞，由中國國民黨黨員胡漢民、戴季陶、廖仲愷、邵元沖鬥編。這篇叫做〈黃埔軍校訓詞〉，因為孫中山是中國國民黨總理，嘛叫〈總理訓詞〉。

1928年北伐煞，中國南北統一了後，戴傳賢建議共黃埔軍校訓詞選做中國國民黨黨歌歌詞。佇中國國民黨中央常務委員會通過了後， 開始徵選樂譜。程懋筠的曲煞尾著第一，議題著銀圓 500箍的獎金。彼時南京金陵大學佮國立中央大學的學生嘛在場試唱，作者嘛家己佇中央廣播電台演唱放送。1929年1月10日，常務委員會決議共程懋筠的選做黨歌，因為歌詞內容充滿愛國思想，曲調也和平、有力、有民族意識。1930年3月24日，行政院發令通國，佇國家製作前，一般聚會攏唱這條黨歌來權（koân）國歌。 起頭只有歌曲旋律，無和聲佮伴奏。正式頒佈了，蕭友梅、趙元任、黃自捌共伊寫伴奏佮和聲。程懋筠創作樂譜的時，本底掠做無偌好就擲掉。In 某佇紙籠揣著了後寄去比賽，煞著冠軍。

後來，輿論想黃埔軍校訓詞是提來勉勵國民黨黨員爾，袂當代表國家，所以教育部就對外徵求國歌歌詞。到1931年6月止，投稿的大約 1700 人，歌詞 2,000 外首，總是濟改審查後，無半條選出來。1936年，國民政府成立「國歌編製研究委員會」，專包攬國歌編製佮研究的代誌，嘛正式登報徵求國歌歌詞，煞尾委員會建議用黃埔軍校訓詞做國歌，因為訓詞足足表明革命建國精神，毋但合中華民國的歷史文化，嘛代表中華民國的建國精神。1937年6月3日，中國國民黨中央常務委員會通過共黨歌選做國歌，佇仝年6月21年經國民政府公佈實行，國歌著確定矣。。

根據 1989 年到 2005 年的《中華民國年鑒》英語版，中華民國國歌捌佇1936年夏季Olympia運動會當選世界上好國歌。

國歌歷史年表

• 五旗共和歌：1912 - 1913
• 卿雲歌（第一版）：1913 - 1915
• 中華雄立宇宙間
  • 原版：1915
  • 第二－三版：1915-1921
• 卿雲歌（第二版）：1921 - 1928
• 中華民國國歌（三民主義歌）:
  • 臨時：1928 - 1937
  • 正式：1937 -

歌詞

原文(文言文)	漢語拼音	讀音（文言音）	翻譯
三民主義　吾黨所宗 以建民國　以進大同 咨爾多士　為民前鋒 夙夜匪懈　主義是從 矢勤矢勇　必信必忠 一心一德　貫徹始終	Sānmín zhǔyì, wú dǎng suǒ zōng; Yǐ jiàn Mínguó, yǐ jìn dàtóng. Zī ěr duōshì, wèi mín qiánfēng; Sùyè fěi xiè, zhǔyì shì cóng. Shǐ qín shǐ yǒng, bì xìn bì zhōng; Yì xīn yì dé, guànchè shǐ zhōng.	Sam Bîn Chú Gī, ngô͘ tóng só͘ chong, í kiàn Bîn Kok, í chìn tāi tông. Chu ní to sū! Ûi bîn chiân hong, siok iā húi hāi, chú gī sī chiông. Sí khîn sí ióng, pit sìn pit tiong, it sim it tek, koàn thiat sú tiong.	三民主義是咱的黨／咱人所奉行的。 來建立中華民國，進前到大同的境界。 啊，恁遮濟濟的志士，是人民的頭陣， 暝日毋通貧惰，跟綴這个主義。 咒誓愛骨力、愛勇敢；定著愛信實、愛忠誠。 對頭到尾，同心實行三民主義！

使用

行升／降中華民國國旗典禮時，佇升降旗進前著愛唱國歌，猶佇升／旗的時奏樂〈中華民國國旗歌〉。中華民國佇1991年6月29日廢除《違警罰法》前，規定聽著唱國歌時，無徛咧表敬意的，罰 20 銀圓（新臺票 60 箍）以下罰鍰抑申誡。

1949年中華民國政府搬到台灣，國家到taⁿ嘛閣咧用。較早電影院放電影前，愛放國家的影片，到1990年代才漸漸取消（對前宜蘭縣長陳定南佇1989年宣佈開始）；電台佇半暝 12 點正報時了後，愛放國歌，這馬毋免。老三台逐工嘛佇放送節目前先放國歌，1990 年代以前嘛會拍「奏國歌前請維持肅靜」的政令宣傳字卡，taⁿ嘛取消。國歌歌詞嘛有誠濟年予人收佇國中國文課本來教，抑現在大半干焦佇音樂課本有爾。

爭議

因為中華民國國歌的歌詞捌是國民黨黨軍學校（黃埔軍校）開學時訓示的文章兼中國國民黨的黨歌，有人看作是以早黨國無分時所留落來的，就排斥，真濟人無愛唱這首歌。民主進步黨執政的縣市大半用種種理由停辦元旦的升旗佮唱國歌典禮，抑佇唱的時跳過「吾黨所宗」彼段。民間平素罕得唱，甚至毋知歌詞的意思。

而且，歌詞頭句的「吾黨」雖罔據線頂辭典《漢典》，有「咱」抑是「阮同鄉」的意思，但是嘛通指「咱的政黨」（國民黨），致到受著物議。

參考

• 中華民國
• 三民主義
• 中華民國國旗歌
• 台灣國歌
• 義勇軍進行曲：現在的中華人民共和國國歌

外口連結

• 國歌影片（行政院新聞局，佇 Youtube）
  • 觀光篇合唱版
  • 觀光篇演奏版
  • 綜合篇合唱版
  • 綜合篇演奏版
  • 國家建設篇合唱版
  • 國家建設篇演奏版
  • 兒童篇合唱版
  • 兒童篇教唱版
• 國花、國旗、國歌 中華民國國情介紹（行政院）