台語百科 Wiki

This wiki's URL has been migrated to the primary fandom.com domain.Read more here

了解更多

台語百科 Wiki
Advertisement

死刑,人間上古老的刑法之一,有權動刑的人,按照法律的許可,執行法律的規定,聽好結束一个犯人的性命,當然這个犯人定著是已經犯了嚴重的罪行,到今,世間人對待"嚴重罪行"的定義、看法無一定相siâng,也就是講閣存在爭議,不而過,對遐的到今猶閣保留"死刑"的國家來講,"刣人者賠人性命"這條規律一貫是實施"死刑"的一个蓋基本的條件。

Sí-hîng, jîn-kan siāng kóo-ló ê hîng-hua̍t tsi-it. Ū kuân tāng-hîng(動刑) ê lâng, àn-tsiàu huat-lu̍t ê hí-khó, tsip-hîng huat-lu̍t ê kui-tīng, thìng-hó kiat-sok 1-ê huān-lâng ê sènn-miā, tong-jiân tsit-ê huān-lâng tiānn-tio̍h sī í-king huān liáu giām-tiōng ê tsuē-hīng (tsuē-hîng). Kàu-tann, sè-kan lâng tuì-thāi "giâm-tiōng tsuē-hîng" ê tīng-gī, khuànn-huat bô-it-tīng siô-siâng, iā-to̍h-sī kóng koh tsûn-tsāi tsing-gī. Put-jî-kò, tuì hiah-ê kàu-tann iáu-koh pó-lîu "sí-hîng" ê kok-ka lâi-kóng, "thâi-lâng—tsiá puê lâng sènn-miā" tsit-tiâu kui-lu̍t it-kuàn sī si̍t-si "sí-hîng" ê 1-ê kài ki-pún ê tiâu-kiānn.

奴隸社會開始就有死刑,到今,有袂少國家猶原保留這項刑法,比論講美國日本新加坡這款的發達國家,以及一寡仔社會主義國家和伊斯蘭國家,這以外,大多數的發展中國家攏有死刑,不而過,歐洲國家透底已經廢除死刑,原因有兩方面,第一是宗教信仰的影響,按照舊約聖經的講法,一切犯罪的人攏有改過自新的機會,無應該用死刑來結束怹的性命,第二種原因聽講是佮"民主制度、法制建設、以及人道主義的發展"有關係。

nôo-lē siā-huē khai-sí to̍h ū sí-hîng, kàu-tann, ū buē-tsió kok-ka iu-guân pó-lîu tsit-hāng hîng-huat, pí-lūn-kóng Bí-kok, Ji̍t-pún, Sin-ka-pho tsit-khuán ê huat-ta̍t kok-ka, í-ki̍p tsi̍t-kuá-á siā-huē tsú-gī kok-ka hām I-su-lân kok-ka. Tse í-guā, tuā-to-sòo ê huat-tián-tiōng kok-ka lóng-ū sí-hîng. Put-jî-kò, Au-tsiu kok-ka thàu-té í-king huè-tû sí-hîng, guân-in û nn̄g hong-bīn, tē-it sī tsong-kàu sìn-gióng ê íng-hiáng, àn-tsiàu Kū-iok Sìng-king ê kóng-huat, it-tshè huān-tsuē ê lâng lóng-ū kái-kò tsū-sin ê ki-huē, bô ìng-kai iōng sí-hîng lâi kiat-sok in ê sìnn-miā; tē-jī tsióng guân-in thiann-kóng sī kah “bîn-tsú tsè-tōo, huat-tsè kiàn-siat, í-ki̍p jîn-tō tsú-gī ê huat-tián” ū kuan-hē.

Hông判死刑的犯人,透底號做"死人犯"抑是"拍銃phoe",咧欲動刑進前,透底攏會hông押去一間特殊的監牢單獨關一站,到甲這款的坎站,司法機關欲做的工課是收集證據,準備動刑,啊犯人嘛聽好提出最後的上訴。

Hông phuànn sí-hîng ê huān-lâng, thàu-té hō-tsuè "sí-lâng-huān" a̍h-sī "phah-tshìng-phue". Leh-beh tāng-hîng tsìn-tsîng, thàu-té lóng-ē hông ah-khì tsi̍t-king ti̍k-sû ê kann-lô tan-to̍k kuainn tsi̍t-tsām. Kàu kah tsit-khuán ê khám-tsām, su-huat ki-kuan beh tsò ê khang-khuè sī siu-tsi̍p tsìng-kù, tsún-pī tāng-hîng, iah huān-lâng mā thìng-hó thê-tshut tsuè-āu ê siōng-sòo.

來看國際特赦組織佮其他有關方面的統計資料:

  • 84个國家,佮百慕達香港澳門紐威島、Thò·-kek-su群島、Khai-kho-su群島...遮的國家佮地區無死刑。
  • 10个國家佮庫克群島到今對特殊情形執行死刑,若普通情形就無死刑。
  • 24个國家規定普通的情行有死刑,不而過若10年內袂當定案的,就袂使執行死刑,比論講露西亞
  • 76个國家,包括中華民國巴勒斯坦,攏規定普通犯罪有死刑。

Lâi khuànn Kok-tsè Ti̍k-sià Tsoo-tsit kah kî-thann íu-kuan hong-bīn ê thong-kè tsu-liāu:

  • 84 ê kok-ka, kah Pik-bōo-ta̍k (百慕達), Hiong-káng, Ò-mn̂g, Níu-ui-tó (紐威島), Thòo-kik-su kûn-tó, Khai-kho-su kûn-tó…Tsiah-ê kok-ka kah tē-khu bô sí-hîng.
  • 10 ê kok-ka, kah Khòo-khik kûn-tó(庫克群島) kan-na tuì ti̍k-sû tsîng-hîng tsip-hîng sí-hîng, nā phóo-thong tsîng-hîng to̍h bô sí-hîng.
  • 24 ê kok-ka kui-tīng phóo-thong ê tsîng-hîng ū sí-hîng, put-jî-kò nā 10-nî-lāi buē-tàng tīng-àn--ê, to̍h buē-sái tsip-hîng sí-hîng. Pí-lūn-kóng Lōo-se-a.

76 ê kok-ka, pau-kuah Tiong-huâ Bîn-kok kah Pa-lik-su-thán, lóng kui-tīng phóo-thong huān-tsuē ū sí-hîng.

另外,根據統計:

  • 目前世界上有99个國家猶咧動死刑。
  • 動刑的方式,主要是"拍銃、絞刑、斬(刣)頭,電刑、毒氣刑、石刑、注射"等等。
  • 採用"拍銃"解決的國家86个,採用"絞刑"的國家77个,干焦中華人民共和國美國正式採取"注射死刑"。

Līng-guā, kun-kù thóng-kè:

  • Bo̍k-tsiân sè-kài-siōng ū 99 ê kok-ka iáu-leh tāng sí-hîng.
  • Tāng-hîng ê hong-sik, tsú-iàu sī "phah-tshìng, ká-hîng (絞刑), tsām(thâi)-thâu, tiān-hîng, to̍k-khì-hîng (毒氣刑), tsio̍h-hîng (石刑), tsù-siā" tíng-tíng.
  • Tshái-iōng "phah-tshìng" kái-kuat ê kok-ka 86 ê, tshái-iōng "ká-hîng" ê kok-ka 77 ê, kan-na Tiong-huâ Jîn-bîn Kiōng-hô-kok kah Bí-kok tsìng-sik tshái-tshú "tsù-siā sí-hîng".

建議去參考[]

  • 無期徒刑
  • 國際特赦組織

Kiàn-gī khì tsham-khò ==

  • Bô-kî tôo-hîng (無期徒刑)
  • Kok-tsè Ti̍k-sià Tsóo-tsik


外部連結[]

Guā-pōo liân-kiat

  • 這篇文章是對河佬百科(Holopedia)的:"Sí-hêng"改來的,原本文章的作者請看伊的編輯歷史
Advertisement