种族主义是一种信念，掠讲有的种族抑是族群比别的较好，有这款信念的人号做种族主义者。
Tsíng-tso̍k-tsú-gī sī 1 tsióng sìn-liām, lia̍h-kóng ū-ê tsíng-tso̍k iah-sī tso̍k-kûn pí pa̍t-ê khah hó. Ū tsit-khuán sìn-liām ê lâng hō-tsò tsíng-tso̍k-tsú-gī-tsiá.
人类四常会共人分做无仝的群体，分拆的标准，捷捷是真明的外表款式，比论：皮肤的色水等等，毋过按呢来共人分做无仝的群体并无定着就是种族主义，种族主义所主张的，是人类中间的群体，有较好佮较䆀的精差伫咧，甲若种族是拢对伊的祖公仔所遗传来的，种族主义就会共这部分人看做较好，另外的人因端独独是怹的祖先无相siâng。
Jîn-luī sù-siông ē kā lâng hun-tsò bô-kâng ê kûn-thé, hun-thiah ê piau-tsún, tsia̍p-tsia̍p sī tsin bîng ê guā-piáu khuán-sik, pí-lūn: phuê-hu ê sik-tsuí t.t. M̄-koh án-ne lâi kā lâng hun-tsò bô-kâng ê kûn-thé pīng bô-tiānn-tio̍h tō sī tsíng-tso̍k-tsú-gī. Tsíng-tso̍k-tsú-gī sóo tsú-tiunn--ê, sī jîn-luī tiong-kan ê kûn-thé, ū khah-hó kap khah-bái ê tsing-tsha tī leh. Kah nā tsíng-tso̍k sī láng uì i ê tsóo-kong-á sóo uî-thuân--lâi-ê, tsíng-tso̍k-tsú-gī tō ē kā tsi̍t-pōo-hūn lâng khuànn-tsò khah hó līng-guā ê lâng, in-tuann to̍k-to̍k sī in ê tsóo-sian bô-sio-siâng.
科学家一般的认为种族是对伫一个所在长时间徛起的家族所生湠来的，毋过，拢总的人种中间是会当互相配合生出后裔的，也按呢有的科学家无相信种族是一项科学事实，怹的理由是逐个个人佮个人本身嘛有足大的精差伫咧，阁若看无仝种族内底的人，嘛通发现怹有袂少共同的特征。
Kho-ha̍k-ka it-puann-tik jīn-uî tsíng-tso̍k sī uì tī 1 ê sóo-tsāi tn̂g sî-kan khiā-khí ê ka-tso̍k sóo senn-thuànn--lái-ê, m̄-koh, lóng-tsóng ê lâng-tsíng tiong-kan sī ē-tàng hōo-siong phuè-ha̍p senn-tshut hōo-è--ê, iā án-ne ū-ê kho-ha̍k-ka bô siong-sìn tsíng-tso̍k sī 1 hāng kho-ha̍k sū-si̍t, in ê lí-îu sī ta̍k-ê kò-jîn kap kò-jîn pún-sin mā ū tsiok tuā ê tsing-tsha tī leh, koh nā khuànn bô-kâng tsíng-tso̍k lāi-té ê lâng, mā thang huat-hiān in ū bē-tsió kiong-tông ê ti̍k-tsing.
现此时真济国家伫法律上并无按种族来取无仝的对待，无分是佗一个种族的人民权利拢平等。
Hiān-tshú-sî tsin tsē kok-ka tī huat-lu̍t-siōng pīng bô àn tsíng-tso̍k lâi tshú bô-kâng ê tuì-thāi, bô hun sī toh-tsi̍t-ê tsíng-tso̍k ê jîn-bîn kuân-lī lóng pîng-tíng.
虽罔大多数的群体拢会对怹本身感觉荣光，毋过相信种族主义会予人去糟跶别的族群，包括剥削别的族群的权利，阁较是去伤害怹的性命，过去，有的国家就捌予种族主义的政府统治过，亲像纳粹德国、民权运动进前的美国佮实行隔开政策 (apartheid)的南非，伫头前遮的例里，真济人失去自由抑性命的khí-tī，干焦是因为怹的种族。
Sui-bóng tuā-to-sòo ê kûn-thé lóng ē tuì in pún-sin kám-kak îng-kng, m̄-koh siong-sìn tsíng-tso̍k-tsú-gī, ē hōo lâng khì tsau-that pa̍t-ê tso̍k-kûn, pau-kuat pak-siah pa̍t-ê tso̍k-kûn ê kuân-lī, koh-khah sī khì siong-hāi in ê sènn-miā. Kuè-khì, ū-ê kok-ka tō bat hōo tsíng-tso̍k-tsú-gī ê tsìng-hú thóng-tī--kuè, tshin-tshīunn Nazi Tik-kok, Bîn-kuân Ūn-tōng tsìn-tsîng ê Bí-kok, kap si̍t-hîng Keh-khui Tsìng-tshik (apartheid) ê Lâm-hui. Tī thâu-tsîng tsiah-ê lē--ni̍h, tsin tsē lâng sit-khì tsū-îu iah sènn-miā ê khí-tī, kan-tann sī in-uī in ê tsíng-tso̍k.
种族主义的团体有三K党 (Ku Klux Klan;KKK), 纳粹党(Nazi)等等。
Tsíng-tso̍k-tsú-gī ê thuân-thé ū Sann-K tóng(Ku Klux Klan;KKK), La̍p-tshuì-tóng(Nazi) tíng-tíng.
- 这篇文章是对河佬百科的："Chéng-cho̍k-chú-gī"改来的，原本文章的作者请看伊的编辑历史。