舞蹈，普通讲跳舞，是指用来表达思想佮感情，社会来往的一款活动，咱嘛有可能单纯为着精神的、宗教的、或者是艺术的目的来跳舞。
Bú-tō, phóo-thong kóng thiàu-bú, sī tsí īng lâi piáu-ta̍t su-sióng kap kám-tsîng, siā-huē lâi-óng ê 1 khuán hua̍t-tōng, lâng mā ū khó-lîng tan-sûn uī-tio̍h tsing-sîn-tik, tsong-kàu-tik, hi̍k-tsiá-sī gē-su̍t-tik bo̍k-tik lâi thiàu-bú.
欲定义啥物是舞蹈，牵涉著无仝族群、所在抑国家等等，伫社会、文化、美学、艺术、道德制限顶悬的看法佮价值观，舞蹈的范围盖阔，包括功能性的(比论台湾原住民祭礼里的舞蹈)佮完全属伫幼路艺术表演的舞蹈(比论芭蕾)。
Beh tīng-gī siánn-mi̍h sī bú-tō, khan-sia̍p-tio̍h bô-kâng tso̍k-kûn, sóo-tsāi iah kok-ka tíng-tíng, tī siā-huē, bûn-huà, bí-ha̍k, gē-su̍t, tō-tik tsè-hān tíng-kuân ê khuànn-huat kap kè-ta̍t-kuan, bú-tō ê huān-uî kài khuah, pau-kuat kong-lîng-sìng--ê (pí-lūn Tâi-uân guân-tsū-bîn tsè-lé--ni̍h ê bú-tō) kap uân-tsuân sio̍k-tī ìu-lōo gē-su̍t piáu-ián ê bú-tō (pí-lūn ballet).
伫运动、体操、花锦趋冰佮花锦泅水嘛加加减减有结合舞蹈的动作佮技术，舞艺的形头佮舞蹈也定定予人做伙比较，甚至互相影响。
Tī ūn-tōng, thé-tshau, hua-gím tshu-ping kap hua-gím sîu-tsuí mā ke-ke kiám-kiám ū kiat-ha̍p bú-tō ê tōng-tsok kap ki-su̍t. Bú-gē ê hîng-thâu kap bú-tō iā tiānn-tiānn hông tsò-hué pí-kàu, sīm-tsì hōo-siong íng-hióng.
有的舞蹈是在场的人相佮参与的，有的是为着社交抑表演的起致为观众进行的，舞蹈本身减采是典礼抑礼的一部分，嘛有可能是斗赛的项目，或是简单欲引起人的情欲，舞蹈有可能无太特殊的意义，毋过嘛凡势亲像真济亚洲舞蹈仝款，基本是一种表示意思，有代表性的工具，艺术家 oan-nā透过跳舞来共想法、情感表现出来，抑者是表达伊的故事。
Ū ê bú-tō sī tsāi-tîunn ê lâng sann-kap tsham-ú--ê, ū ê sī uī-tio̍h siā-kau iah piáu-ián ê khí-tì uī kuan-tsiòng tsìn-hîng--ê. Bú-tō pún-sin kiám-tshái sī tián-lé iah lé ê 1 pōo-hūn, mā ū khó-lîng sī tàu-sài ê hāng-bo̍k, hi̍k-sī kan-tann beh ín-khí lâng ê tsîng-io̍k. Bú-tō ū khó-lîng bô tài tia̍t-sû ê ì-gī, m̄-koh mā huān-sè tshin-tshīunn tsin tsē A-tsiu bú-tō kāng-khuán, kin-pún sī 1 tsióng piáu-sī ì-sù, ū tāi-piáu-sìng ê kang-khū. Gē-su̍t-ka uan-nā thàu-kuè thiàu-bú lâi kā sīunn-huat, tsîng-kám piáu-hiān--tshut-lâi, iah-tsiá-sī piáu-ta̍t 1 ê kòo-sū.
编舞是创造舞蹈的艺术，编舞的人就是编舞者(编舞家)。
Pian-bú sī tshòng-tsō bú-tō ê gē-su̍t, pian-bú ê lâng tō-sī pian-bú-tsiá (pian-bú-ka).