認識論是哲學的一个分支，嘛有人講做智識論，認識論所研究的主題是真理佮智識的性質、原頭和界限（人會當了解的界限等等）。
Jīn-sik-lūn sī tiat-ha̍k ê tsi̍t-ê hun-ki, mā ū lâng kóng-tsò tì-sik-lūn. Jīn-sik-lūn sóo gián-kìu ê tsú-tê, sī tsin-lí kap tì-sik ê sìng-tsit, guân-thâu hām kài-hān (lâng ē-tàng liáu-kái ê kài-hān tíng-tíng)
佇一个領域的討論，一直攏致心佇咧分析智識的本質佮智識和一寡相倚的觀念（比論講真理、信篤）中間的關係，有真濟討論佮證成（英語：justification, theory of justification）有底帶，認識論學者會去分析逐項智識主張後壁證成的標準，也就是主張的人伊著有甚物根據才會用得講伊知影某一項事實，一來二去，認識論所問的是親像遮的問題： "你敢有影知影你量講你知影的代誌？"佮"你是按怎知影你知影的代誌的？"
Tī tsit-ê líng-hi̍k ê thó-lūn, it-ti̍t lóng tì-sim tī leh hun-sik tì-sik ê pún-tsit kap tì-sik hām tsi̍t-kuá sio-uá ê kuan-liām (pí-lūn-kóng tsin-lí, sìn-táu) tiong-kan ê kuan-hē. Ū tsin tsē thó-lūn kap tsìng-sîng (Ing-gí: justification, theory of justification) ū tī-tāi. Jīn-sik-lūn ha̍k-tsiá ē khì hun-sik ta̍k-hāng tì-sik tsú-tiunn āu-piah tsìng-sîng ê piau-tsún, ia̍h-tsīu-sī tsú-tiunn ê lâng i tio̍h ū sím-mi̍h kin-kì tsiah ē-īng-tit kóng i tsai-iánn bóo-tsi̍t-hāng sū-si̍t. It-lâi-jī-khì, jīn-sik-lūn sóo mn̄g--ê sī tshin-tshīunn tsiah-ê būn-tê: "lí kám ū-iánn tsai-iánn lí liōng-kóng lí tsai-iánn ê tāi-tsì?" kap "lí sī án-tsuánn tsai-iánn lí tsai-iánn ê tāi-tsì--ê?"
欲研究智識的理論，窮實是有誠濟無仝的步數的，這站仔有一寡新的研究已經共幾若世紀的舊假定捒倒，嘛因為按呢，認識論到今猶原是真活動的學科。
Beh gián-kìu tì-sik ê lí-lūn, khîng-si̍t sī ū tsiânn tsē bô-kâng ê pōo-sòo--ê, tsit-tsām-á ū tsi̍t-kuá sin ê gián-kìu í-king kā kuí-ā sè-kí ê kū ká-tīng sak-tó, mā in-uī án-ne, jīn-sik-lūn kah tann îu-guân sī tsin ua̍h-tāng ê ha̍k-kho.
下跤是認識論定定處理的問題：
- 咱人是按怎確實知影一項代誌/物件的？
- 咱人對代誌/物件有佗一寡重耽的思考方式？
- 敢有彼款會當確定思考方式是著或者是毋著的方法？
- 這世間敢有不可知的領域佇咧？若準有，是用啥款形體存在的？
Ē-kha sī jīn-sik-lūn tiānn-tiānn tshú-lí ê būn-tê:
- Lán lâng sī án-tsuánn khak-si̍t tsai-iánn tsi̍t-hāng tāi-tsì/mi̍h-kiānn--ê?
- Lán lâng tuì tāi-tsì/mi̍h-kiānn ū toh-tsi̍t-kuá tîng-tânn ê su-khó hong-sik?
- Kám ū hit-khuán ē-tàng khak-tīng su-khó hong-sik sī tio̍h hi̍k-tsiá-sī m̄-tio̍h ê hong-huat?
- Tsit sè-kan kám ū put-khó-ti ê líng-hi̍k tī-leh? Nā tsún ū, sī īng siánn-khuán hîng-thé tsûn-tsāi--ê?
- 這篇文章是對河佬百科(Holopedia)的："Jīn-sek-lūn"改來的，原本文章的作者請看伊的編輯歷史。