資本主義是經濟的一款結構抑是講系統，這款結果是一種取資本的流動做基本原理的制度，頭前講的資本，是指佇社會投入貨幣，遮的貨幣經過佇社會裏流動了後，投資者通收著比投入閣較濟的貨幣，若遮的貨幣(錢)，就是一般所講的資本。
Tsu-pún-tsú-gī sī king-tsè ê 1 khuán kiat-kòo iah-sī kóng hē-thóng, tsit-khuán kiat-kòo sī 1 tsióng tshú tsu-pún ê lîu-tōng tsò ki-pún guân-lí ê tsè-tōo. Thâu-tsîng kóng ê tsu-pún, sī tsí tī siā-huē tâu-ji̍p huè-pè, tsia-ê huè-pè king-kuè tī siā-huē--ni̍h lîu-tōng liáu-āu, tâu-tsu-tsiá thang siu-tio̍h pì tâu-ji̍p koh-khah tsē ê huè-pè, nā tsiah-ê huè-pè (tsînn), tō-sī it-puann sóo kóng ê tsu-pún.
法國革命彼站仔，濟濟人對社會經濟的大發展開始有愈來愈深沉的思考，牽涉著產業革命的推展， 經過18~19世紀了後確定落來的大量生產的款式，佮生產和經濟體系改移，造成的新的散凶佮洘旱、飢荒佮疫病等等天災無底代的，社會結構所致的慘慼)，真濟人有做研究，並且對社會活動的實際現象提出說明，這內底卡爾‧馬克斯(Karl Marx)佇19世紀中期，踮伊的著作資本論裏，是共資本主義定義做"生產手路集中佇少數資本家手裏，另外有大多數的勞動者，除去出賣家己的勞動力，無別項生活方式的生產款式"。
Huat-kok Kik-bīng hit-tsām-á, tsē-tsē lâng tuì siā-huē king-tsè ê tuā-huat-tián khai-sí ū jú lâi jú tshim-tîm ê su-khó, khan-sia̍p-tio̍h sán-gia̍p kik-bīng ê tshui-tián, king-kuè tsa̍p-peh tsa̍p-káu sè-kí liáu-āu khak-tīng--lo̍h-lâi ê tuā-liōng sing-sán ê khuán-sik, kap sing-sán hām king-tsè thé-hē kái-î, tsō-sîng ê sin ê sòng-hiong (kap khóo-uānn, ki-hng kap i̍k-pēnn tíng-tíng thian-tsai bô-tī-tāi--ê, siā-huē kiat-kòo sóo-tì ê tshám-tsheh), tsin tsē lâng ū tsò gián-kìu, pīng-tshiánn tuì siā-huē hua̍t-tōng ê si̍t-tsè hiān-siōng thê-tshut suat-bîng, tsit lāi-té Karl Marx tī tsa̍p-káu sè-kí tiong-kî, tiàm i ê tù-tsok Tsu-pún-lūn--ni̍h, sī kā tsu-pún-tsú-gī tīng-gī tsò "sing-sán tshíu-lōo tsi̍p-tiong tī tsió-sòo ê tsu-pún-ka tshíu--ni̍h, līng-guā ū tuā-to-sòo ê lôo-tōng-tsiá, tû-khì tshut-bē ka-tī ê lôo-tōng-li̍k, bô pa̍t-hāng sing-ua̍h hong-sik ê síng-sán khuán-sik."
資本主義本身，佇無仝的學科、學者佮學派內底，甚至佇普通民眾的話語中間，定定有定義頂懸蓋大的精差佇咧，這是咱咧使用這個詞的時陣，定着愛細膩的所在。
Tsu-pún-tsú-gī pún-sin, tī bô-kâng ê ha̍k-kho, ha̍k-tsiá kap ha̍k-phài lāi-té, sīm-tsì tī phó-thong bîn-tsiòng ê uē-gí tiong-kan, tiānn-tiānn ū tīng-gī tíng-kuân kài tuā ê tsing-tsha tī-leh, tse sī lán leh sú-iōng tsit-ê sû ê sî-tsūn, tiānn-tio̍h ài sè-jī ê sóo-tsāi.
- 這篇文章是對holopedia的："Chu-pún-chú-gī"改來的，原本文章的作者請看伊的編輯歷史。