Keh-lí Li̍k-huat(格里曆法; Gregorian calendar) sī hiān-tsú-sî thong sè-kài siāng phóo-phiàn ê li̍k-huat. Tsit ê li̍k-huat sī Kàu-tsong Luî-ko-lí tsa̍p-sann-sè(雷戈里十三世; Gregorius XIII) tī 1582 nî 2 gue̍h 24 kong-pòo--ê, tsú-iàu sī kā 1582 nî 10 gue̍h tshue-4 ê keh-tíng-kang tīng tsò 1582 nî 10 gue̍h 15; sú-iōng AD tsò kí-guân, lūn-nî mā ū sin-ê kui-iok.
Guân-té ê Iû-liû-su Li̍k-huat(尤流斯曆法; Julius calendar) sī 4-nî 1-lūn, pîng-sòo-sî 1 nî 365 kang, lūn-nî ke 1 kang, 1 nî tshé-ûn ū 365.25 kang. Tsóng--sī jı̍t-thâu nî pîng-kun sī 365.242190419 kang, kú--lâi tsing-tsha jú lâi jú tuā. Gregorius Li̍k-huat 4-nî 1-lūn, m̄-koh nā-sī uē-tàng hōo 100 tsíng-tû ê nî bô lūn, uē-tàng hōo 400 tsíng-tû ê nî koh ū lūn, 1 nî tshé-ûn ū 365.2425 kang, ke tsin tsing-khak.
352 nî thâu-tsı̍t-kái ê ki-tok-kàu tāi-hue kui-ting tshun-hun sī tī 3 gue̍h 21 hit-kang. Iû-liû-su li̍k kap jı̍t-thâu-nî ê tsing-tsha king-kuè tshing-guā-nî ê luí-tsik, tì-sú 1582 nî tsiànn-sı̍t ê tshun-hun í-king tsáu-khì 3 gue̍h 31 lo. Sóo-í tī 1582 nî ài kiám sǹg 10 kang, hōo 1583 nî ê tshun-hun uē-tàng tńg-lâi-khì 3 gue̍h 21.
Kàu-tsong ê hō-līng kan-tann tī Thian-tsú-kàu ê kok-ka ū-hāu, sin-kàu ê kok-ka tshin-tshīunn Ing-kok it-tı̍t kàu 18 sè-kí tsiah kái-īng Gregorius li̍k. Lôo-se-a sìn Tang-tsiànn-kàu, it-tı̍t kàu 20 sè-kí tsiah uānn--kuè--lâi.
Keh-lí Li̍k-huat sī 1 tsióng ji̍t-thâu-li̍k. Sòo-siông kóng ê kong-li̍k, sin-li̍k, se-li̍k, iông-li̍k lóng sī tsí Keh-lí Li̍k-huat.
- Tsit phinn sī uì Hô-ló-pah-kho(Holopedia) ê : "Gregorius Le̍k-hoat" kái-lâi ê. Guân-pún ê tsok-tsiá tshiánn khuànn i ê pian-tsi̍p li̍k-sú.